Kapokūlani at the hālau in Wailua Iki

‘O ko lākou nei hele akula nō ia a hō‘ea i ua hale nei, kū ihola lākou nei ma ka puka a ‘ike maila nā kānaka a me nā wāhine o loko i kēia po‘e wāhine u‘i e kū aku nei, a ho‘okani a‘ela lākou i nā wāhine u‘i. ‘Ōlelo a‘ela ho‘i kekahi po‘e o lākou, he po‘e wāhine malihini kēia.
Iā lākou nei e kū ana, e hula ana nō ho‘i ‘o loko. ‘O ka hula e hula ‘ia ana i ia wā, he hula ‘ōlapa. ‘O ka hele kēia a ho‘omaha ia hula, ‘o ko Hi‘iaka kau akula nō ia, ‘oiai, ua ‘ike akula ‘o ia i ka hoa hānau, iā Kapokūlani, e noho mai ana i ka uluwehiwehi. Ua ‘ike maila nō ho‘i ‘o Kapo i ka pōki‘i ali‘i o lākou, a kulu ihola kona mau waimaka.

Kanikanihia Hikapōloa ē
‘O ka la‘i o Wailua Iki
La‘i malino a Kapo i noho ai
I noho nanea nō i ka la‘i o Kona
Aloha
‘O kānaenae aloha ihola nō ia lā
‘O ka leo
‘O ka leo ka mea aloha ē
Noho ana Kapo i ka uluwehiwehi
Kū ana i luna o Maoheleia
Ka ‘ōhai kū i Maunaloa
Aloha mai Kaulana‘ula
Eia mai ka ‘ūlāleo lā
He waimaka
He mōhai aloha na‘u iā ‘oe, e Kapo
‘O Kapokūlani, ‘o Moehaunaiki
E hea au iā ‘oe
Ō mai ho‘i.