Piliamo‘o and Kuāua, the Mo‘o of Wailuku River Nānā akula ‘o Hi‘iaka a ‘ike akula he lā‘au ‘ahakea ka lā‘au e moe ana mai kēia ‘ao‘ao aku o ke kahawai a kau ma kēlā ‘ao‘ao, a ke hahaki kēia lā‘au, a i ‘ole, ke kapeke nō ho‘i ka hehi ‘ana a ka mea e hele ana ma luna o ua lā‘au lā, ‘o ka hā‘ule nō ia i lalo o ka lipolipo hohonu o ka muliwai, a ‘o ka pau maila nō ia i ka hamu ‘ia e Piliamo‘o mā. Li‘uli‘u iki nō ho‘i kā Hi‘iaka nānā ‘ana iā lalo o Wailuku, huli maila ia a kama‘ilio maila iā Pi‘ihonua, “He ‘oia‘i‘o kāu mea i hō‘ike maila. E hele nō ke kanaka ma luna o kēia papa a i kolohe ‘ia a‘e nō e nei mau mo‘o, e hā‘ule ana nō ‘o ia i lalo a make nō i nei mau kupu ‘ino. Inā nō e ‘au aku ana nō ke kanaka ma loko o ka wai, ua like nō ia me kona hahao maoli ‘ana aku nō iā ia i loko o nā waha o nei mau mo‘o. He pilikia nui kēia o ko Hilo nei mau kini, a pēlā ho‘i nā huaka‘i hele mai nā Kona mai, nā Kohala mai. E ho‘ā‘o wale a‘e ho‘i au i ka‘u wahi pono a i ‘ae ‘ia mai, ua pono kākou, a i ‘ae ‘ole ‘ia mai nō ho‘i, huli hou a‘e nō ho‘i paha i ala hele ‘oko‘a, i pae aku ai kākou ma kēlā kapa.”
|