Battling the spirits of Waiolama

Ho‘omau akula nō ‘o Hi‘iaka mā i ka pi‘i ‘ana a hō‘ea i Waiolama. A iā lākou nō na‘e e hele aku nei, ua ‘ike maila nā kini a me ka lehu o nā ‘ula lele o ia mau wahi iā lākou, a hō‘ulu‘ulu koke a‘ela lākou iā lākou iho no ka lele ‘ana mai e pepehi iā lākou nei. Ua pi‘i a‘ela ke kino makani puahiohio o ua po‘e ‘e‘epa nei o Waiolama, puehu li‘ili‘i ka lau lā‘au, kū ka ‘e‘a o ka lepo, pūkākā ka manu lele ‘ōpe‘ape‘a i ka ‘ehu a ka makani.

“Ē! ‘Ino ho‘i kēia e haluku mai nei i ka lau lā‘au,” wahi a Wahine‘ōma‘o i pane aku ai i ke aikāne, iā Hi‘iaka.
“‘Ae, he ‘ino kēia. ‘Ike mai nei nā kini o ke akua, ka mano o ke akua, ka lau o ke akua, a me ka lehu o ke akua o Waiolama nei iā kākou, ua ala a‘ela ua po‘e ‘e‘epa nei a ke paio mai nei iā kākou. Inā aku kākou i mua i kā make ai nā akua li‘ili‘i o Waiolama.”

‘Oiai lākou nei e hele aku ana, ua loa‘a maila lākou nei i ka wili a ka makani puahiohio, ‘a‘ole i kana mai ka ikaika. A inā ‘a‘ole i loa‘a he kino pāpālua iā Hi‘iaka, a ‘a‘ole ho‘i ‘o ia i hā‘awi aku i kauwahi lihi o kona mana i ke aikāne, inā nō ua puehu li‘ili‘i ka lau o ke ‘uki i nei lele ‘ana maila a nā ‘e‘epa o Waiolama; akā, ma muli o ka mana nui i loa‘a iā Hi‘iaka, ua lilo ka ikaika hui ‘ia o ua po‘e ‘ula lele nei i mea pā‘ani wale ‘ia nō e ka “u‘i o ka palekoki uila o Kīlauea.”