Pele meets Lohi‘au

I ka ‘ike ‘ana mai ho‘i o kēia anaina kanaka i nei wahine u‘i e hele aku ana me ka ulumāhiehie a pau, ho‘okani nui a‘ela lākou i nā leo piha mahalo no ka wahine u‘i, ‘a‘ohe ona lua e loa‘a ai ma ka mokupuni a pau ‘o Kaua‘i.

He mea ‘oia‘i‘o, ua ho‘oku‘u pau ihola ua mō‘ī wahine nei o ka hikina a ka lā ma Ha‘eha‘e i kona nani a pau ma luna iho ona. A ua ‘ōlelo ‘ia, ua like ka lamalama o nā helehelena o ua Pele nei i kēia wā me ka mahina piha i ka pō ‘o Māhealani. He u‘i ho‘i tau!

‘O ko ua Pele nei hele akula nō ho‘i ia a kahi a ke anaina kanaka e muia ana; ua ho‘oka‘awale a‘ela lākou i loa‘a ai ona alanui hele no ka u‘i malihini e hele aku nei me ka ulumāhiehie nui.

Aia ka ‘aha kanaka ma waho o ka hale hula o nā ali‘i ke mahae lua lā iā lākou iho, a ‘o ke ali‘i wahine ho‘i o ka lua, aia ke hele lā me ka hano hāweo a kilakila nō o kona kūlana, ma ke kōā a ka ‘aha kanaka i ho‘oka‘awale iho ai no ua u‘i malihini nei e hele aku ana.

‘O ka hele a ka wahine u‘i
Meha ka leo i ke kula
‘A‘ohe hauwala‘au a nā manu
Ua la‘i ka nohona me ka maluhia.

I kēlā wā a ua u‘i ho‘okalakupua nei e hele aku nei, ua ‘ike maila nā ali‘i e muia ana i loko o ka hale a Lohi‘auipo mā e hula ana, a pā maila kā lāua kāhea ‘ana, “Hele loa mai nō a komo mai i loko nei o ka hale!”